2010 թ. հունիսի 10-ին, ժ. 17:00-ին Կանանց իրավունքների կենտրոնը (ԿԻԿ) կազմակերպում է հանդիպում-քննարկում <<Ընտանեկան բռնության կանխարգելումը Հայաստանում>> թեմայով, որը տեղի կունենա Ավ. Իսահակյանի անվան կենտրոնական գրադարանի (ք. Երևան, Նալբանդյան 4/1) հանդիպումների դահլիճում:

Հանդիպմանը կներկայացվի ընտանեկան բռնության իրավիճակը Հայաստանում, դրա տեսակները, հիմնական պատճառները և ԿԻԿ-ի գործունեությունը դրա դեմ պայքարի ուղղությամբ: Կներկայացվեն մանրամասներ Կանանց իրավունքների կենտրոնի կողմից 2009թ. կատարված ընտանեկան բռնության դեպքերի վիճակագրական տվյալների, օրենսդրական փոփոխությունների, տեղեկատվական քարոզարշավների և ծառայությունների, այդ թվում Ազգային Թեժ Գիծ անվճար ծառայության վերաբերյալ, այնուհետև Մարիամ Օհանյանի <Լռության տարածքը՚> ֆիլմը, որը մի կնոջ իրական պատմություն էր ներկայումս տիրող իրավիճակի վերաբերյալ:

Կանանց իրավունքների կենտրոնն ընտանեկան բռնության հիմնախնդրով զբաղվող հասարակական կազմակերպություն է, որի նպատակն է կանխարգելել ընտանիքում կանանց և երեխաների նկատմամբ կիրառվող բռնությունը, համախմբել հասարակության ուժերը ընտանեկան բռնության դեպքերը բացահայտելու և դրա դեմ ակտիվ պայքար ծավալելու համար, ինչպես նաև խախտելու լռությունը կանանց նկատմամբ բռնության մասին`դարձնելով այն հանրային քննարկման առարկա: