Կանանց իրավունքների կենտրոնը պարբերաբար անցկացնում է արտ-թերապիայի դասընթացներ կին շահառուների և նրանց երեխաների հետ: Արտ-թերապիան բուժում է` հիմնված գեղարվեստական ստեղծագործության վրա:

Այդ գործընթացն անմիջականորեն կապված է տեսողական կերպարների ստեղծման հետ, որտեղ ակնհայտորեն ներգրավված են գեղարվեստական ստեղծագործությունը, դրա հեղինակը և հոգեբանը : Վերջինս մանրազնին ծանոթանում է գործընթացի նրբություններին և մանրամասներին, քանի որ ունի խորհրդանշական հաղորդակցման պրոֆեսիոնալ հմտություններ և ձգտում է ստեղծել կին շահառուի համար ստեղծագործական աշխատանքի այնպիսի միջավայր, որում կինն իրեն բավական պաշտպանված կզգա խիստ մտահոգություններն արտահայտելու համար:

Արտ թերապիան օգտագործվում է նաև որպես ստեղծագործական ինքնաարտահայտման միջոց և նպաստում է թաքնված մտածմունքերի և հույզերի բացահայտմանը, ինչպես նաև դրանցից ազատվելուն: Այն էականորեն փոխում է ընտանեկան բռնության ենթարկված կնոջ հոգեվիճակը, նվազեցնում է անհանգստությունը` զարգացնելով նրանց ստեղծագործական պատկերացումը: